ပြယုဒ်တခုကို ဆောင်ကြဉ်းခဲ့သူများ

ပရင့်ထုတ်ရန်


The Blind Sideဇာတ်ကားအမည်                          The Blind Side
ဒါရိုက်တာ                                   John Lee Hancock
စာရေးဆရာ                                 Michale Lewis
အဓိကသရုပ်ဆောင်                       Sandra Annette BullocK၊ Quinton Aaron၊
Tim McGraw၊ Jae Head
အမျိုးအစား                                 Biography, Drama and Sport.
တရားဝင် ထုတ်ပြန်သည့်ရက်           နိုဝင်ဘာ ၂ဝ ၊ ၂ဝဝ၉။

အသက် ၁၇ နှစ်အရွယ် Michale Oher (Quinton Aaron) သည် အာဖရိကန်-အမေရိကန် လူမျိုးတဦး ဖြစ်သည်။ သူ့ကိုယ်ခန္ဓာသည် အခြားသော ဆယ်ကျော်သက်အရွယ် လူငယ်များ၏ ၃-၄ ဆခန့် ရှိနေသဖြင့် များသောအားဖြင့်တော့ သူ့ကို Big Mike ဟု ခေါ်ကြပြီး Mike ကြီးပြင်းရာ နေရာသည် အိုးအိမ် ပြန်လည် နေရာချထားရေး နေရာတခုတွင် ဖြစ်သည်။ မိခင်ဖြစ်သူက မူးယစ်စေသည့်အရာ မှန်သမျှကို အလွန်အကျွံ သုံးစွဲသူ၊ ဖခင်ဖြစ်သူက တာဝန်ခံမှု ကင်းမဲ့သူ။ ထိုအရာများသည်ပင် Mike အား အိမ်နှင့် ဝေးစေခဲ့သည်။ Mike သည် အမြဲတမ်း တိတ်ဆိတ် နေတတ်သူ၊ သို့သော်လည်း ကလေးငယ်လေးများအား ခင်မင်ချင်သည့် စိတ်သည် သူထံတွင် ရှိသည်။

Sean (Jae Head) နှင့် Mike တို့ တွေ့သောအခါ အလျင်အမြန်ပင် သူငယ်ချင်း ဖြစ်သွားသည်။

တနေ့ည ကျေးဇူးတော်နေ့ ကျောင်းပျော်ပွဲရွှင်ပွဲအပြီး ပြန်လာသည့် Sean တို့ မိသားစုနှင့် အေးခဲလွန်းလှသည့် လမ်းပေါ်တွင် အနွေးအထည် မပါဘဲ လမ်းလျှောက်လာသည့် Mike အား sean ၏ ဖခင်ဖြစ်သူ Sean Tuohy (Tim McGraw) က ဘယ်သွားမလဲဟု မေးသည်တွင် Mike က အားကစားရုံကို သွားမည်ဟု ပြန်ဖြေလိုက်သည်။

Sean ၏ မိခင် Leigh Anne Tuohy (Sandra Bullock) က ယခုအချိန်သည် အားကစားရုံ ပိတ်ထားပြီ ဖြစ်ကြောင်းနှင့် အားကစားရုံသို့ မည်သည့် အတွက်ကြောင့် သွားမလဲဟု မေးရာ၊ အားကစားရုံသည် Mike ၏ အိပ်ယာဖြစ်ကြောင်း သိရှိသွားသည့်အခါ Mike အား သူတို့မိသားစု နေထိုင်ရာ အိမ်ဆီသို့ ခေါ်လာခဲ့သည်။

နောက်တနေ့တွင် Anne က Mike အား ဘုရားသခင်၏ ဂုဏ်ကျေးဇူးတော်အတိုင်း သူမ မိသားစုနှင့်အတူ နေထိုင်ရန် ပြောဆိုသည့်အခါ ထိုအရာများသည် အဝတ်တထည် ကိုယ်တခုနှင့် နေစရာ အိုးအိမ်မဲ့နေသည့် လူငယ်ကလေး Mike ၏ အပြောင်းအလဲ စတင်မြစ်ဖျားခံရာ ဖြစ်သည်။

Anne ၏ မိတ်ဆွေများက Mike အား ခေါ်ယူထားခြင်းသည် နောင်တချိန်တွင် Anne ၏ သားသမီးများအပေါ် တစုံတခုသော အကျိုးသက်ရောက်မှုများ ဖြစ်ပေါ်လာနိုင်သည်ဟု ပြောဆိုဝေဖန်နေသည်တို့ကိုလည်း Anne တို့ မိသားစုက ဂရုမစိုက်။ လူလူချင်း ခွဲခြားမှုသာလျှင် ရှက်ဖွယ်ရာ အပြုအမူအဖြစ် ပြန်လည်တုံ့ပြန်ခဲ့သည်။ Mike သည်လည်း Anne တို့ မိသားစုဝင် သားသမီးတဦးအဖြစ်သာ ရှုမြင်ခဲ့သည်။

ရဲဘော်ရဲဘက် ညီအကိုသဖွယ် ဖြစ်လာသော Sean ၏ နည်းပြမှုအောက်တွင် Mike သည် ဒေသခံနယ်မြေရှိ ကျောင်းတွင် အမေရိကန် ဘောလုံး ကစားသမားတဦး ဖြစ်လာခဲ့ရပြီး အသင်းတွင် အားကြီးသူတဦး ဖြစ်သည့်အပြင် သူ့အသင်းတွင် အသုံးဝင်သည့် အားကစားသမား ဖြစ်လာခဲ့သည်။ နောက်ပိုင်းတွင် Mike သည် တက္ကသိုလ် ကစားသမားအဆင့်သို့တိုင် ရောက်ရှိလာခဲ့သည်။

ပညာသင်ကြားရေးဘက်တွင် Mike ၏ အသိဥာဏ်တို့သည် တက္ကသိုလ် ဝင်ရောက်ခွင့်အတွက် နိမ့်ကျလျက် ရှိသော်လည်း Anne တို့ မိသားစု၏ ကူညီထောက်ပံ့မှု၊ အချိန်ပိုင်းကျူရှင် ဆရာမ မစ္စ Sue (Kathy Bates) တို့၏ စေတနာပြည့်ဝစွာဖြင့် အနီးကပ် သင်ကြားပို့ချမှု အောက်တွင် Mike ၏ GPA (Grade Point Average) သည်လည်း မြင့်တက်လာခဲ့ရသည်။

နောက်ပိုင်း ထူးချွန်သည့် အားကစားမားတဦး ဖြစ်လာသည့် Mike အား တက္ကသိုလ် ၃ ခု တို့က အလိုရှိလာသည့်အခါ … အောင်မြင်သော လူတဦး ဖြစ်လာရန်နှင့် ယခုထက်မက ထူးချွန်သော ကစားတဦးဘဝကို ပိုင်ဆိုင်နိုင်ရန်အတွက် Mike တယောက် ရင့်သန်လာပြီဖြစ်သည့် သူ့အသိညဏ်နှင့် မည်သို့များ ဆုံးဖြတ်လေမလဲ။ Mike တယောက် သူ၏ အောင်မြင်မှုအပေါ် မည်သူများက အသုံးချမှာလဲ။

… …. …. ….

The Blind Side သည် အာဖရိကန်-အမေရိကန် လူငယ်မဲလေးတဦးအား လူဖြူမိသားစုတစုမှ ကိုယ့်သွေးသားကဲ့သို့ပင် ပြုစုပျိုးထောင်ပေးသည့် လူမှုရှုခင်းပေါ်က မေတ္တာအဖွဲ့အနွဲ့ ဇာတ်ကားလေးတခု ဖြစ်သော်လည်း သတိချပ်ဖွယ်ရာများ ပြည့်နှက်နေသည့် ဇာတ်ကားကောင်းတခု ဖြစ်သည်။ ကမ္ဘာပေါ်တွင် အသွေးအရောင် ခွဲခြားမှုစနစ် ပျောက်ပျက်နေပါပြီဟု မည်မျှပင် ကြွေးကြော်နေစေကာမူ The Blind Side တွင်မူ အနည်းအကျဉ်းမျှတော့ တွေ့မြင်ရမည်ဖြစ်သည်။ 

The Blind Side ကို ဒါရိုက်တာ John Lee Hancock ရိုက်ကူးခဲ့သည်။ သူသည် အမေရိကန် ဇာတ်ညွှန်းရေးသူတဦး ဖြစ်သည့်အပြင် ဖလင်ဒါရိုက်တာတဦးဖြစ်ပြီး၊ ထုတ်လုပ်သူတဦးလည်း ဖြစ်သည်။ သူရိုက်ကူးခဲ့သည့် အကောင်းဆုံးဇာတ်ကားများမှာ ၂ဝဝ၂ ခုနှစ်အတွင်း ရုံတင်ပြသခဲ့သည့် The Rookie နှင့်  ၂ဝဝ၉ ခုနှစ် နိုဝင်ဘာလအတွင်း ရုံတင်ပြသခဲ့သည့် The Blind Side ဇာတ်ကားတို့ ဖြစ်သည်။ The Blind Side ဇာတ်ကားတွင် မင်းသမီး Sandra Bullock သည် ၂ဝ၁ဝ ခုနှစ်တွင် ကျင်းပသည့် အကယ်ဒမီပေးပွဲ၌ အကောင်းဆုံး သရုပ်ဆောင်ဆုကို ဆွတ်ခူးနိုင်ခဲ့သည်။

The Blind Side ၏ ထုတ်ဝေသူများကတော့ Broderick Johnson, Andrew Kosove နှင့် Gil Netter တို့ ဖြစ်သည်။ The Blind Side သည် ဂျာနယ်လစ်တဦး ဖြစ်သည့်အပြင် တကယ့်အဖြစ်အပျက်များကို ရေးသားသူ အမေရိကန်လူမျိုး Michale Lewis ၂ဝဝ၆ ခုနှစ်က ထုတ်ဝေခဲ့သည့် The Blind Side: Evolution of A Game ကို အခြေခံပြီး ဒါရိုက်တာ John Lee Hancock က ပြန်လည် ဇာတ်ညွှန်းရေးဖွဲ့ထားသည်။

The Blind Side မှာ ပါဝင်သရုပ်ဆောင်သူတွေက ၁၉၅၅ ခုနှစ်တွင် ပြသခဲ့သည့် Why You were sleeping နှင့် ၁၉၉၄ ခုနှစ်တွင် ပြသခဲ့သည့် Speed နှင့်အတူ ပရိသတ်ကြားမှာ လူသိများလာခဲ့သည့် အမေရိကန် သရုပ်ဆောင် Sandra Annette Bullock ၊ ၁၉၈၄ ခုနှစ်ဖွား အမေရိကန်လူမည်း သရုပ်ဆောင် Quinton Aaron ၊ အမေရိကန် ကျေးလက်သီချင်းအဆိုတော်နှင့် သရုပ်ဆောင်တဦးဖြစ်သည့် Tim McGraw ၊ ၁၉၉၁ ခုနှစ်တွင် Misery (1990) ဇာတ်ကားဖြင့် အကယ်ဒမီဆုကို ဆွတ်ခူးခဲ့သည့် မင်းသမီးကြီး Kathy Bates နှင့် ၁၉၉၆ ခုနှစ်ဖွား အမေရိကန် ကလေးသရုပ်ဆောင် Jae Head တို့က အဓိက သရုပ်ဆောင်များအနေဖြင့် ပါဝင်သရုပ်ဆောင်ထားခြင်း ဖြစ်သည်။

ထိုကားတွင် မင်းသမီး Sandra Bullock မှာ အကောင်းဆုံး အမျိုးသမီး သရုပ်ဆောင်ဆုကို ရရှိခဲ့ပြီး၊ တခြားသော Golden Blobe ၏ Bast Actress - Motion Picture Drama၊ Screen Actors Guild Award ၏ Outstanding Performance by Female Actor in a leading Role နှင့် People’s Choice Award ၏ Favorite Movie Actress ဟူသည့် ဆု ၃ ဆု ကိုပါ ရရှိခဲ့သည်။ The Blind Side တွင် Sandra Bullock ၏ သွက်လက်ထက်မြက်သည့် သရုပ်ဆောင်ချက်များနှင့်အတူ မိခင်တဦး၏ သားသမီးအပေါ် ကာကွယ်ပေးလိုသည့် ရဲရင့်သည့် စိတ်ဓာတ်တို့သည် ဇာတ်ကား၏ အရှိန်ကို ပိုမိုမြင့်အောင် စွမ်းဆောင်နိုင်ခဲ့သည်။

The Blind Side ကို Warner Bros က ဖြန့်ချိခဲ့ပြီး လွန်ခဲ့သည့်နှစ် နိုဝင်ဘာလ ၂ဝ ရက်နေ့တွင် တရားဝင် ရုံတင်ပြသခဲ့သည်။ ပြသချိန် ၁၂၉ မိနစ်ရှိသည့် The Blind Side သည် ပင်ကိုယ်အရည်အသွေး ပြည့်ဝလှသည့် မင်းသမီး Sandra Bullock ၏ ပြောစကားများအောက်တွင် The Blind Side သည် ပိုမိုအသက်ဝင်လှသည်ဟု ထင်မိသည်။ ဇာတ်ကားသည် လူမှုရှုခင်းပေါ်တွင် အခြေခံထားသည့်အတွက် သမားရိုးကျဇာတ်ကားဟု ထင်မြင်မိမည် ဖြစ်သော်လည်း ဇာတ်ကွက်အား ဖြည်းဖြည်းမှန်မှန် တဆင့်ချင်း တဆင့်ချင်းဖြင့် မြှင့်တင်သွားသည့်အတွက် ကြည့်ရှုရသည်မှာ စိတ်ဝင်စားဖွယ် ကောင်းလှပါသည်။

အမှန်တကယ်ပင် ဒီကမ္ဘာလောကအတွင်း Leigh Anne Tuohy တို့သော မိသားစုများ ရှိနေသမျှ ကာလပတ်လုံး Mike တို့ ကဲ့သို့ပင် အနာဂတ်လမ်းပေါ်တွင် မယိမ်းမယိုင် တည့်မတ်ဖြောင့်ဖြူးစွာ လျှောက်လှမ်းသွားနိုင်မည့် လူငယ်ကလေးများ ဆက်လက်၍ ပေါ်ထွန်းလာနေဦးမည်သာ ဖြစ်သည်။

ဇူလိုင် ၁ဝ၊ ၂ဝ၁ဝ။