ဗုံးကွဲမှုကိစ္စ ကောလာဟလများကို အလေးအနက်မထားကြရန် ဘာသာရေးခေါင်းဆောင်များ တိုက်တွန်း

ပရင့်ထုတ်ရန်

နယူးဒေလီ (မဇ္ဈိမ)။   ။ အိန္ဒိယနိုင်ငံ၊ ဗုဒ္ဓဂယာတွင် ဇူလိုင်လ ၇ ရက်နေ့က ဖြစ်ပွါးခဲ့သော ဗုံးခွဲတိုက်ခိုက်မှုကို လမ်းမှား
ရောက်နေသော ရာဇဝတ်သားများက ကျူးလွန်ခဲ့မှုအဖြစ်သာ ရှုမြင်ကြရန်နှင့် မြန်မာနိုင်ငံရှိ ရိုဟင်ဂျာ မူဆလင်များ
အတွက် လက်တုံ့ပြန် တိုက်ခိုက်မှုအဖြစ် မယူဆကြရန် အိန္ဒိယ နိုင်ငံတဝှမ်းရှိ ဘာသာရေး ခေါင်းဆောင်များနှင့် ငြိမ်းချမ်းရေး လုပ်ငန်း ဆောင်ရွက်နေသူများက ပန်ကြားလိုက်ကြောင်း The Hindu သတင်းစာကြီးတွင် ရေးသားထား
သည်။

ဗုံးဖောက်ခွဲမှုကို ရှုတ်ချပြီး ဘာသာရေးနှင့် သမိုင်းအရ ထူးခြားမြင့်မြတ်သည့် နေရာတွင် အပြစ်မဲ့သူများကို ပစ်မှတ်ထား တိုက်ခိုက်ခဲ့သည့် ဆိုးရွားလှသော အကြမ်းဖက် တိုက်ခိုက်မှုအတွက် အလွန်အမင်း ထိတ်လန့်နာကျင်
ရပါကြောင်း၊ လူသားမျိုးနွယ်အပေါ် ကျူးလွန်သည့် အဆိုပါ ပက်စက်လှသည့် ရာဇဝတ်မှုအတွက် ကန့်ကွက်ရှုတ်ချ
ကြောင်း အင်္ဂါနေ့က ပန်ကြားလွှာတွင် ဖော်ပြပါရှိသည်။

မဟာဗောဓိနှင့် ဗုဒ္ဓဘာသာ နေရာဌာနများ ဗုံးခွဲတိုက်ခိုက်မှုသည် မြန်မာနိုင်ငံရှိ မူဆလင်များအပေါ် လက်တုံ့ပြန် တိုက်ခိုက်မှု ဖြစ်နိုင်သည် ဟူသော မှန်းဆပြောဆိုချက်များအပေါ် အလေးအနက် မထားရန်နှင့် စုံစမ်းစစ်ဆေးမှု
ကို ကောင်းမွန်စွာ လုပ်ကိုင်ပြီး တရားခံများကို ဖော်ထုတ်နိုင်သည်အထိ စောင့်ဆိုင်းသင့်ကြောင်း သူတို့က ပြောသည်။

ပန်ကြားလွှာတွင် လက်မှတ်ရေးထိုးကြသူများမှာ အိန္ဒိယနိုင်ငံတဝှမ်းရှိ ရုပ်ရှင်ထုတ်လုပ်သူများ၊ လူမှု လွတ်လပ်ခွင့် အဖွဲ့များ၊ မူဆလင် အဖွဲ့အစည်းများ၊ ဟိန္ဒူအဖွဲ့အစည်းများ၊ နယူးဒေလီ ကတ်သလစ် ဘုရားကျောင်းတော်၊ ဘာသာရေး ဘက်မလိုက် အဖွဲ့များ၊ တာတာ လူမှုသိပ္ပံကျောင်း၊ ငြိမ်းချမ်းရေး ဌာန စသည်တို့ ပါဝင်သည်။

သူတို့အနေဖြင့်မူ ယခုတိုက်ခိုက်မှုသည် လာမည့် (အိန္ဒိယ)အထွေထွေရွေးကောက်ပွဲမတိုင်မီ နိုင်ငံရေးအရ ကွဲပြဲမှု
ပေါ်ပေါက်လာစေရန် ရည်ရွယ်ပြုလုပ်ခြင်း ဖြစ်နိုင်သည်ဟု ယူဆကြသည်။

ကောလာဟလများကြောင့် မြန်မာနိုင်ငံရှိ မူဆလင်ဘာသာဝင်များအပေါ် အသစ်တဖန် အကြမ်းဖက် တိုက်ခိုက်မှုများ
ပေါ်ပေါက်လာမည်ကိုလည်း စိုးရိမ်ပူပန်ကြသည်။

လက်သည်တရားခံများကိုအမြန်ဆုံးဖမ်းမိနိုင်ရေးအတွက် မြန်ဆန် စနစ်ကျ စေ့စပ်သေချာသည့် စုံစမ်းစစ်ဆေးမှုများ
ပြုလုပ်ကာ ထိုလုပ်ရပ်ကို လုပ်ဆောင်ခဲ့သည့်သူများ၊ ပူးပေါင်း ကြံစည်ခဲ့ကြသူများ အားလုံးကို ဖော်ထုတ်အရေးယူ အပြစ်ပေးရန်လည်း အဆိုပါ ကြေညာချက်က အိန္ဒိယအစိုးရကို တိုက်တွန်းထားသည်။