www.padamyarfm.com
www.padamyarfm.com
http://goo.glhdUIvl
ဗုဒ္ဓဟူး, ၂၂ နိုဝင်ဘာ ၂၀၁၇

Mizzima Burmese

Home > အာဘော်နှင့်အမြင် > အယ်ဒီတာ့အာဘော် > မြေယာပြဿနာ မှန်ကန်မြန်ဆန်စွာ ဖြေရှင်းဆောင်ရွက်ရေး

မြေယာပြဿနာ မှန်ကန်မြန်ဆန်စွာ ဖြေရှင်းဆောင်ရွက်ရေး

အီးမေးလ်ပို့ရန် ပရင့်ထုတ်ရန် PDF ဖိုင်ရယူရန်

မြန်မာနိုင်ငံ ပြုပြင်ပြောင်းလဲရေးလုပ်ငန်းစဉ်ထဲမှာ ဘယ်အရာတွေဟာ အခက်ခဲဆုံးအရာတွေ ဖြစ်နေသလဲ။
ပြည်တွင်းပြည်ပ အကဲခတ်လေ့လာသူအများစုကတော့ မြေယာပြဿနာဟာ ပြုပြင်ပြောင်းလဲရေးလုပ်ငန်းစဉ်
အတွင်း ဖြေရှင်းရခက်တဲ့ ပြဿနာတစ်ခုအဖြစ် မြင်ကြပါတယ်။

မှန်ပါတယ်။ မြေယာပြဿနာဟာ အခြားပြဿနာများဖြစ်တဲ့ ပြည်တွင်းငြိမ်းချမ်းရေး ပြဿနာနည်းတူ အင်မတန်
အရေးကြီးတဲ့ ပြဿနာ၊ ဖြေရှင်းရမလွယ်ကူတဲ့ ပြဿနာ၊ မဖြေရှင်းနိုင်ရင်လည်း ပြုပြင်ပြောင်းလဲရေးလုပ်ငန်း မအောင်မြင်စေနိုင်တဲ့ အရေးကြီးအခြေခံပြဿနာအဖြစ် ယူဆမယ်ဆိုရင်လည်းရနိုင်တဲ့ ပြဿနာပါပဲ။

မြန်မာနိုင်ငံဟာ စိုက်ပျိုးရေးအဓိကအားပြုရပ်တည်တဲ့နိုင်ငံ ဖြစ်ပါတယ်။ တိုင်းပြည်ရဲ့ ၈၀ ရာခိုင်နှုန်းသော လူဦးရေ
ဟာ ကျေးလက်လူထုဖြစ်ပြီး လယ်ယာစိုက်ပျိုးရေးတစ်ခုတည်းအပေါ် ရပ်တည်ကြရပါတယ်။ ဒီလိုအနေအထားမှာ လယ်ယာလုပ်ကိုင်ရပ်တည်ကြသူတွေအတွက် တည်ငြိမ်ပြီး သင့်လျော်မှန်ကန်တဲ့ လယ်ယာမြေဆိုင်ရာဥပဒေများ
ပြဋ္ဌာန်းဆောင်ရွက်နိုင်ခြင်း မရှိသေးတာဟာ ဒီတိုင်းပြည်မှာ လယ်ယာမြေ ပြဿနာ အခိုင်အမာရှိနေတယ်ဆိုတဲ့
အချက်ကို မီးမောင်းထိုးပြရာ ၀န်ခံရာလည်း ရောက်ပါတယ်။

မိမိတို့နိုင်ငံရဲ့ ၁၉၈၈ ခုနှစ်နောက်ပိုင်း မြေယာအသုံးချမှုအခြေအနေကို ပြန်ကြည့်မယ်ဆိုရင် မြေယာပိုင်ဆိုင်မှုရရှိတဲ့
မြေပိုင်ရှင်အသစ်တွေကို တွေ့လာရပါတယ်။ အဓိကကျတဲ့ မြေယာပိုင်ဆိုင်သူ အသစ်တွေကတော့ ကြီးမားတဲ့ စီးပွားရေးလုပ်ငန်းရှင်ကြီးများနဲ့ တပ်မတော်ဖြစ်လာခဲ့ပါတယ်။ ဥပမာအနေနဲ့ပြောရရင် ကချင်ပြည်နယ် ဟူးကောင်း
တောင်ကြားဒေသမှာရှိတဲ့ မြေဧက၊ မြေလွတ်မြေရိုင်းများအဖြစ်နဲ့လည်းကောင်း၊ အဓမ္မသိမ်းယူခြင်းအဖြစ်နဲ့ လည်းကောင်း၊ ပုဂ္ဂလိကလုပ်ငန်းရှင် တရုတ်ကုမ္ပဏီများကို လွှဲပြောင်းချထားပေးခဲ့ပါတယ်။ နောက်ထပ်ဥပမာတစ်ခု
ကတော့ ၁၉၉၉ ခုနှစ်၊ ဇန်န၀ါရီလအတွင်းမှာ ရန်ကုန်တိုင်း၊ မကွေးတိုင်း၊ ဧရာဝတီတိုင်းတို့မှာရှိတဲ့ မြေဧက ၂၀၀,၀၀၀ ကို ပုဂ္ဂလိကလုပ်ငန်းရှင် ကိုးဦးထံ လွှဲပြောင်းချထားပေးခဲ့ပါတယ်။ ပြီးခဲ့တဲ့ ပြည်သူ့လွှတ်တော်
အစည်းအဝေးမှာဆိုလျှင် တပ်မတော် တာဝန်ရှိသူက ထုတ်ဖော်ပြောကြားရာမှာ တပ်မတော်က နည်းအမျိုးမျိုးနဲ့ ရယူထားခဲ့တဲ့ မြေဧက ၂၉၇,၀၀၀ ကျော်ရှိတယ်လို့ သိရပါတယ်။ ဒီလို မြေပိုင်ရှင်အသစ်တွေ မိုးဦးကျမှိုတွေလို
ပေါ်ပေါက်လာရခြင်း အခြေခံအကြောင်းတရားတွေထဲမှာ မြေယာဥပဒေတွေ ရေရာတိကျမှု မရှိခြင်းနဲ့ ၈၀ ရာခိုင်နှုန်းသော မြန်မာ့တောင်သူလယ်သမားများရဲ့ အကျိုးစီးပွားအပေါ် အခြေမခံတဲ့ မြေယာမူဝါဒအမှားများ
ကြောင့်ပဲ ဖြစ်ပါတယ်။

၁၉၈၈ ခုနှစ်နောက်ပိုင်းမှာ ယခင်စစ်အစိုးရက စီးပွားရေးလုပ်ငန်းတွေ ဖော်ဆောင်လုပ်ကိုင်ရာမှာ လယ်ယာမြေနဲ့
ပတ်သက်တဲ့ ဆောင်ရွက်ချက်တွေ မဟာအမှားကြီးမှားခဲ့တာ တွေ့ရပါတယ်။ မြေယာပိုင်ဆိုင်မှုနဲ့ ပတ်သက်တဲ့ ဥပဒေတွေကလည်း ရှင်းလင်းခိုင်မာမှု မရှိခဲ့ပါဘူး။ မြေယာနဲ့ပတ်သက်တဲ့ အစိုးရဌာနအသီးသီးမှာလည်း မြေယာ
စာရင်းဇယားကအစ စနစ်တကျမရှိဘဲ တိကျမှန်ကန်တဲ့ကိန်းဂဏန်းများ မှတ်သားထားနိုင်ခဲ့ခြင်း မရှိပါဘူး။
မြေယာပိုင်ဆိုင်သူ၊ မြေယာအမျိုးအစား၊ မြေယာခွဲဝေသတ်မှတ်မှု၊ အစရှိတဲ့ မြေယာဆိုင်ရာ အရေးကြီး ဥပဒေ
ဖွင့်ဆိုချက်များဟာလည်း အင်မတန်ရှုပ်ထွေးပြီး ရှင်းလင်းတိကျမှု မရှိခဲ့ပါဘူး။ ဒီလိုအခြေအနေမျိုးအပေါ် နှစ်ပေါင်း
ဆယ်စုနှစ်နှစ်ခုကျော် ရပ်တည်ဆောင်ရွက်လာခဲ့ခြင်းကြောင့် ရရှိလာတဲ့ အကျိုးကတော့ နှစ်ပေါင်းများစွာ လယ်ယာလုပ်ကိုင်လာခဲ့တဲ့ ဆင်းရဲသားလယ်သမားတွေဟာ မြေမဲ့ယာမဲ့တွေ ဖြစ်ကုန်ကြရပြီး မြေပိုင်ရှင်ဘ၀
ကနေပြီး လယ်သီးစားဘ၀ရောက်ကုန်ကြရတဲ့ အကျိုးဆက်ပါပဲ။

ယခုတော့ မြေယာများဆုံးရှုံးကြရတဲ့ တောင်သူလယ်သမားများကလည်း မိမိတို့မြေယာများ ပြန်လည်ရရှိရေး
တောင်းဆိုလာနေကြပြီဖြစ်သလို ပြည်ထောင်စုလွှတ်တော်နာယကကြီး သူရဦးရွှေမန်းကိုယ်တိုင်ကလည်း လယ်သမားများမြေယာတွေ ပြန်လည်ရရှိရေး အမြန်ဆောင်ရွက်ဖို့ ထားဝယ်ခရီးစဉ်အတွင်း တိုက်တွန်းတဲ့အဆင့်
အထိ ရောက်ရှိလာကြပြီ ဖြစ်ပါတယ်။

ထို့ကြောင့် မြန်မာပြည် ပြုပြင်ပြောင်းလဲရေးလုပ်ငန်းစဉ်ကြီးအတွင်းမှာ လယ်ယာမြေပြဿနာဟာဖြင့် ဆွဲနုတ်ရ
ခက်ခဲသည့် ဆူးတစ်ချောင်းအဖြစ်ရှိနေပြီး သည်ဆူးကို မှန်ကန်သည့် မြေယာဥပဒေများ၊ မှန်ကန်သည့် ရပ်တည်ချက်များကို အခြေခံပြီး ဆောင်ရွက်မှသာ နုတ်ယူလို့ရနိုင်မည်ဖြစ်ကြောင်း တင်ပြလိုက်ပါတယ်။