www.padamyarfm.com
www.padamyarfm.com
http://goo.glhdUIvl
ကြာသပတေး, ၁၆ သြဂုတ် ၂၀၁၈

Mizzima Burmese

Home > အာဘော်နှင့်အမြင် > အယ်ဒီတာ့အာဘော် > ပညာရေးပြုပြင်ပြောင်းလဲမှုများ နိုင်ငံအတွက် အရေးတကြီးလိုအပ်

ပညာရေးပြုပြင်ပြောင်းလဲမှုများ နိုင်ငံအတွက် အရေးတကြီးလိုအပ်

အီးမေးလ်ပို့ရန် ပရင့်ထုတ်ရန် PDF ဖိုင်ရယူရန်

လွန်ခဲ့သော နှစ်ပေါင်းသုံးဆယ်အတွင်း မြန်မာနိုင်ငံ၏ ပညာရေးစနစ်သည် အုပ်စိုးသူ အစိုးရအပေါ်မူတည်ပြီး အပြောင်းအလဲများလွန်းသည့် ပညာရေးစနစ် ဖြစ်ခဲ့သည်။ နောက်ဆုံးတွင် ပညာရေးဝန်ကြီး တစ်ယောက်
ပြောင်းတိုင်း ထိုပုဂ်္ဂိုလ်အပေါ်မူတည်ကာ ပညာရေးစနစ်ပါ လိုက်လံပြောင်းလဲရသည်အထိ ခိုင်မာမှု မှန်ကန်မှုမရှိ
ဖြစ်ခဲ့သည်။

ထို့အပြင် ကျောင်းသားများ မစုစည်းနိုင်ရန်၊ ၁၉၈၈ ခုနှစ်အတွင်းက ဖြစ်ပေါ်ခဲ့သည့် ဒီမိုကရေစီအတွက် ဆန္ဒပြပွဲများ
ဖြစ်မလာရန်၊ ကျောင်းသားများ နိုင်ငံရေးတွင် မပါဝင်လာနိုင်ရန်စသည့် ရည်မှန်းချက်အမျိုးမျိုးဖြင့် လုပ်ဆောင်သော အခြင်းအရာများသည် မြန်မာနိုင်ငံ ပညာရေးအဆင့်အတန်းကို နိမ့်ကျစေခဲ့သည်။ နစ်နာသည်မှာ ပညာရေးစနစ်နှင့် ထိုစနစ်နှင့်တွဲနေရသော ကျောင်းသူ၊ ကျောင်းသားများ၊ ဆရာ၊ ဆရာမများသာမက၊ နိုင်ငံဖွံ့ဖြိုးတိုးတက်မှုစသည့် ဘက်ပေါင်းစုံတွင် ထိခိုက်ခဲ့ရသည်။ မတည်ငြိမ်လွန်းသည့် ပညာရေးစနစ်များကြောင့်လည်းကောင်း မှားယွင်းသည့် ပညာရေးမူဝါဒများကြောင့် လည်းကောင်း ရရှိလာရသည့် အကျိုးဆက်ဒဏ်မှာ နိုင်ငံ၏လူငယ်တော်တော်များများ
သည် ဓါတ်ခွဲခန်းအတွင်းက ဖားသူငယ်များကဲ့သို့ ဖြစ်ခဲ့ကြရသလို ကျောင်းဆရာ ဆရာမတော်တော်များများလည်း ပညာရေးကို ငွေအသပြာဖြင့် ရောင်းချ အသက်မွေးကျောင်းရသည့် ဘ၀သို့ ရောက်ရှိသွားတော့သည်။

နိုင်ငံ၏ မျိုးဆက်လူငယ်များမှာ မှားယွင်းသည့် ပညာရေးစနစ်နှင့် တင်းကျပ်သည့် အုပ်ချုပ်မှုများကြောင့် တိုးတက်ဖို့
ထက် နောက်သို့ပြန်လျှောကျဆင်းသွားခြင်း ရလဒ်ကို ရခဲ့ကြရ၏။ တခြားနိုင်ငံများ တိုးတက်နေသည့်အချိန်တွင်
မြန်မာနိုင်ငံမှာ နောက်ပြန်ဆုတ်ယုတ်နေခဲ့သည်မှာ အစိုးရအရာရှိများပင် ထုတ်ဖော် ၀န်ခံခဲ့ရသည်အထိ ဖြစ်ခဲ့သည်။

အမျိုးသားလွတ်တော်၏ ဥက္ကဋ္ဌဖြစ်သူ ဦးခင်အာင်မြင့်က မြန်မာနိုင်ငံ၏ ပညာရေးစနစ်ကို လွန်ခဲ့သည့် အပတ်က လွှတ်တော်တွင် ပြင်းပြင်းထန်ထန်ဝေဖန်ရာ၌ စနစ်တွင်သာမက ယင်းပညာရေးစနစ်ကို အကောင်အထည်ဖော်ကြ
ရသည့် ကျောင်းဆရာ ဆရာမများ၏ အခြေအနေကိုပါ ထောက်ပြဝေဖန်ခဲ့သည်။

လက်ရှိပညာရေးစနစ်သည် ကျောင်းသားဗဟိုပြု ပညာရေးစနစ်မဟုတ်ဘဲ ပညာရေး ဒု-၀န်ကြီး ကိုယ်တိုင်သည်ပင် လွှတ်တော်အတွင်း မေးမြန်းမှုများကို ဖြေကြားရာတွင် ကျက်လာသည့် စာကို အလွတ်ပြန် ဖတ်ပြသွားသည်နှင့် တူနေသည်ဟု ထောက်ပြကာ၊ ပညာရေးဝန်ထမ်းများကိုလည်း လိုအပ်သော အရည်အချင်း မြှင့်တင်မှု သင်တန်းများ ပို့ချရန် လိုအပ်သည်ဟု ဝေဖန်သွားခဲ့သည်။

မြန်မာနိုင်ငံ ပညာရေးစနစ် မအောင်မြင်ရခြင်းမှာ ချမှတ်သည့် ပညာရေးစနစ် မမှန်ကန်ခြင်းအပြင် ပညာရေးဝန်ထမ်း
များအနေဖြင့်လည်း လုံလောက်ခိုင်မာသော ပံ့ပိုးမှုများ မရှိသည်ကလည်း အခက်အခဲတစ်ခုပင်ဖြစ်သည်။ ထို့ကြောင့် ယင်းအချက်နှစ်ချက်စလုံး အကျုံးဝင်နေသည့် ပညာရေးဘတ်ဂျက်များကို လေ့လာလျှင် မြန်မာနိုင်ငံ၏ လက်ရှိ
ပညာရေးဘတ်ဂျက်မှာ ယခင် စစ်အစိုးရ အဆက်ဆက်လက်ထက်က ပညာရးအသုံးစရိတ်ထက် ပိုမိုရရှိလာသည်မှာ
တော့ မှန်ပါသည်။ သို့သော် ပညာရေး အသုံးစရိတ်တစ်ခုတည်းဖြင့်၊ ကျောင်းသုံးပစ္စည်းများ ပြည့်စုံလာခြင်းဖြင့်၊
ကျောင်းဆရာ ဆရာမများ ဆန်အိုးအတွင်း ဆန်ပြည့်အောင် ဖြည့်ပေးခြင်းဖြင့် မြန်မာနိုင်ငံ၏ ပညာရေးစနစ်
ကောင်းမွန်လာလိမ့်မည်ဟူသည်မှာ မသေချာသေးပါ။

ပညာရေး မူဝါဒရေးရာသည် ကျောင်းသားဗဟိုပြုပညာရေး၊ စာသင်ခန်းပြင်ပ အသိပညာ ဖွံ့ဖြိုးမှု ပညာရေးနှင့် လက်တွေ့ဘ၀ ဆက်စပ်နိုင်ရေး၊ အသက်မွေးဝမ်းကျောင်း အထောက်အကူပြု ပညာရေးနှင့် ကျောင်းသားများ၏
တွေးခေါ်မျှော်မြင်မှု အဆင့်အတန်း မြင့်မားတိုးတက်ရေးများပါ ထည့်သွင်းတွက်ချက် စဉ်းစားရမည် ဖြစ်သည်။

နိုင်ငံတစ်နိုင်ငံ အထူးသဖြင့် အစအစအရာရာ နိမ့်ကျနေသော နိုင်ငံတစ်နိုင်ငံအဖို့ နိုင်ငံ၏ အခြေအနေအရပ်ရပ်ကို
မြှင့်တင်ဖို့ကြိုးစားမည်ဆိုလျှင် ပညာရေးသည် အဓိကအရေးကြီးသော ရေရှည်လုပ်ငန်းစဉ်ကြီးဖြစ်သည်။ ခုတပ်ဆင် ခုပြင်ဆင် ခုပြောင်းလဲ၍ ရစကောင်းသော လုပ်ငန်း မဟုတ်ချေ။ ရေရှည်မျှော်မှန်းပြီး ရေရှည်မြှုပ်နှံရင်းနှီးရသော လုပ်ငန်းစဉ်ကြီးဖြစ်သည်။ ထို့ကြောင့် ယခုအခါ မိမိတို့ နိုင်ငံ၏ ပြုပြင်ပြောင်းလဲရေးများထဲမှ တစ်ခုဖြစ်သည့် ပညာရေး ပြုပြင်ပြောင်းလဲမှုလုပ်ငန်းသည် နောင်အနာဂတ် အမိနိုင်ငံ၏ ကံကြမ္မာကို ပြဋ္ဌာန်းမည်ဖြစ်သည့်အတွက် ပညာရေးမူဝါဒ ချမှတ်သူများ၊ ပညာရေး ၀န်ထမ်းများ၊ ပညာရေး ဘတ်ဂျက်ရေးဆွဲသူများအနေနှင့် အဖက်ဖက်မှ အဆင့်မြင့်မြင့် လေ့လာစဉ်းစား ညှိနှိုင်းပြီးမှသာ ချမှတ်ဆောင်ရွက်သင့်ကြောင်း အကြံပြုအပ်သည်။