မိုးထဲလေထဲတွင် ပြည်သူ့သတင်းစာဆရာတစ်ဦး ဆုံးရှုံးရခြင်း

ပရင့်ထုတ်ရန်

မနေ့မနက်က ပြည်သူ့သတင်းစာဆရာတစ်ဦးဖြစ်သူ သတင်းစာဆရာကြီး မောင်ဝံသ ကွယ်လွန်သွားခဲ့သည်။ မိမိတို့ သတင်းစာတိုက်တစ်ခုလုံး သတင်းထောက်ငယ်လေးများက အစ သတင်းစာဆရာကြီး မောင်ဝံသ ကွယ်လွန်ခြင်း
သတင်းအပေါ် စိတ်ခံစားမှုကိုယ်စီဖြင့် ဆရာမောင်ဝံသ၏ ဂုဏ်ပုဒ်များကို ပြောဆိုနေမိခဲ့ ကြသည်။ မှန်ပါသည်။ ဆရာမောင်ဝံသသည်ကား ပြည်သူချစ်သော စာရေးဆရာကြီးတစ်ဦး၊ ပြည်သူ့အကျိုးဆောင်ရွက်ရင်း ပြည်သူ့ဘက်မှ
ရှေ့နေလိုက်သည့် သတင်းစာတစ်ဦးအဖြစ် ခိုင်မာတက်ကြွစွာရပ် တည်ရင်း ကွယ်လွန်သွားခဲ့ခြင်းဖြစ်သည်။ မိမိတို့
တိုင်းပြည်အတွက် အစားထိုးမရနိုင်သည့် ဆုံးရှုံးမှုကြီးအဖြစ် မှတ်တမ်းတင်ရပါသည်။

မည်သည့် ပညာရပ်ဆိုင်ရာ နယ်ပယ်တွင်မဆို လူအမျိုးအစားနှစ်ရပ်ရှိပါသည်။ ထိုလူအမျိုးအစားနှစ်ရပ်မှာ ထိုသူတို့ ခံယူရပ်တည်သည့် အယူအဆနှင့် ရပ်တည်ချက်အပေါ်မူတည်ကာ ပြည်သူတို့ သတ်မှတ်ပေးသော ဂုဏ်ထူး
ဝိသေသများကို ခံယူကြရလေ့ရှိသည်။ ဆရာမောင်ဝံသကိုမူ ပြည်သူ့ဘက်မှရပ်တည်သော ပြည်သူ့ဘက်မှ ရှေ့နေ
လိုက်ပေးနေသော၊ ပြည်သူတို့အပေါ် သစ္စာရှိသော စာရေးဆရာ သတင်းစာဆရာကြီးတစ်ဦးအနေနှင့် ရပ်တည်
ဆောင်ရွက်သွားသူဖြစ်သဖြင့် ပြည်သူတို့က ပြည်သူ့သတင်းစာဆရာတစ် ဦးအဖြစ် လေးစားချစ်ခင်စွာ ဂုဏ်ထူး
ဝိသေသပေးထားကြခြင်းဖြစ်သည်။ အမှန်စင်စစ် ထိုသို့သော ဂုဏ်ထူးဝိသေသများမှာ လုပ်ယူလို့လည်းမရ ၀ယ်ယူလို့
လည်းမရသည့်အပြင် အာဏာနှင့်ဖန်တီးယူလို့လည်း မရသည့် ဂုဏ်ထူးဝိသေသများဖြစ်ကြသည်။

မိမိတို့နိုင်ငံ နယ်ချဲ့အင်္ဂလိပ်လက်အောက် နေခဲ့ရစဉ်က မြန်မာသတင်းစာဆရာကြီးလည်းဖြစ်၊ ကဗျာဆရာကြီးလည်း
ဖြစ်သူ ဆရာကြီးသခင်ကိုယ်တော်မှိုင်းသည် အင်္ဂလိပ်နယ်ချဲ့အစိုးရက မြန်မာပြည်သို့ ခေတ္တခဏရောက်ရှိလာမည့် အင်္ဂလိပ်အိမ်ရှေ့မင်းသားဖြစ်သူ ဝေလမင်းသားအတွက် ဘုန်းတော်ဘွဲ့ကဗျာတစ်ပုဒ် ရေးစပ်ပေးရန် ငွေအသပြာ (၁၀၀၀) ပေး၍ ကမ်းလှမ်းခံခဲ့ရဖူးသည်။ ဆရာကြီးသည် ပြတ်သားစွာငြင်းပယ်ကာ ထိုစဉ်ကတန်ဖိုးကြီးလှသည့် ဆုလာဘ်အသပြာကို ခေါင်းခါပစ်ပယ်လိုက်ခြင်းအားဖြင့် မြန်မာပြည်သူလူထုကြီးဘက်မှ ရပ်တည်ကာ နယ်ချဲ့အစိုးရ
ကို ဆန့်ကျင်ကြောင်း ပြသခဲ့သည်။ ထို့ကြောင့်ပင် ဆရာကြီး သခင်ကိုယ်တော်မှိုင်းသည် ပြည်သူတို့ပေးသော မျိုးချစ်
စာဆိုကြီးဆိုသည့် ဂုဏ်ထူးဝိသေသကို ပိုင်ဆိုင်သွားခဲ့ရ၏။

ယခုအချိန်အခါတွင် မိမိတို့နိုင်ငံသည် ဒီမိုကရေစီ ပြုပြင်ပြောင်းလဲရေးအတွက် သမိုင်းအလှည့်အပြောင်းကြီးတစ်ခုကို
ဖြတ်သန်းနေရသည့်အချိန်ဖြစ်သည်။ ယင်းအချိန်တွင် ဒီမိုကရေစီကိုရှေးရှုသော ပြည်သူတို့အတွက် လမ်းမှန်လမ်း
တည့်စေသော စာနယ်ဇင်းဆိုင်ရာ ကြိုးပမ်းဆောင်ရွက်မှုတို့မှာ လွန်စွာအရေးကြီး လိုအပ်သော အချိန်လည်းဖြစ်သည်။ ဒီမိုကရေစီရေးဆောင်ရွက်မှုများကို အပြင်းအထန်ငြင်းခုန်ရင်း သတိကြီးစွာထားကာ ရှေ့တိုးဆောင်ရွက်နေကြရသည့်
အချိန် တစ်နည်းအားဖြင့်ဆိုလျှင် ဒီမိုကရေစီရေး မိုးထဲ လေထဲ ဖြတ်သန်းနေကြရသည့်အချိန်တွင် ဆရာမောင်ဝံသ ကွယ်လွန်သွားခဲ့ခြင်းဖြစ်သည်။

သတင်းစာဆရာ၊ စာရေးဆရာကြီး မောင်ဝံသသည် သူ့ခေတ်သူ့အခါ သူဖြတ်သန်းရသည့်ခေတ်တွင် ပြည်သူတို့အား ဖိနှိပ်သည့် အစိုးရကပေးသည့် အကျဉ်းထောင်အတွင်း သိမ်ငယ်မှုကင်းစွာ ရဲရင့်ဂုဏ်ယူလျက် လက်ခံဖြတ်သန်းခဲ့သူ
ဖြစ်သည်။ သတင်းစာ ဆရာကြီးမောင်ဝံသသည်ကား ပြည်သူတို့အပေါ်ဖိနှိပ်သည့် အစိုးရများ၏ ဖောက်ပြန်မှားယွင်းမှု
များကို ထောက်ပြကန့်ကွက်သည့်၊ ပြည်သူ့ဘက်မှရပ်တည်သည့် မွန်မြတ်သည့် နိုင်ငံ့သားကောင်းတစ်ဦးအဖြစ် ထင်ရှားကြံ့ခိုင်စွာ ကမ္ဗည်းထိုးနိုင်ခဲ့ပြီဟု မိမိတို့အနေနှင့် အခိုင်အမာ ယုံကြည်မိပါသည်။ သတင်းစာဆရာကြီး
မောင်ဝံသကွယ်လွန်ခြင်းအတွက် မဇ္ဈိမမီဒီယာ အင်အားစုအနေဖြင့် ကျန်ရစ်သူ ဆရာမောင်ဝံသ၏ မိသားစုနှင့်ထပ်တူ ၀မ်းနည်းကြေကွဲရပါကြောင်း မှတ်တမ်းတင်အပ်ပါသည်။